ଚୋରା ମୋଟରସାଇକଲ୍ ସହ ଅଭ୍ୟାସଗତ ଅପରାଧୀ ଗିରଫ
ଜଟଣୀ: ଜଟଣୀ ଥାନାଧିକାରୀଙ୍କ ନିର୍ଦ୍ଦେଶ କ୍ରମେ ଥାନାର ଏକ ଟିମ୍ ହରିଭାଇନା ଛକ ନିକଟରେ ମୋଟରଯାନ ଚେକିଂ କରୁଥିବା ବେଳେ ସ୍ଥାନୀୟ ବାଛରାପାଟଣା ଅଞ୍ଚଳର କାହ୍ନୁ ବଳିୟାରସିଂହ (୩୬) ଏକ ୟାମାହା ମୋଟରସାଇକେଲ ଚଳାଇ ମ୍ୟୁନିସିପାଲିଟି ଛକ ଅଭିମୁଖେ ଯାଉଥିବାର ଦେଖିଥିଲେ । ଉକ୍ତ ଗାଡିର ନମ୍ବର ପ୍ଲେଟକୁ ଦେଖି ଚେକିଂ ଡ୍ୟୁଟିରେ ମୁତୟନ ଥିବା ପୁଲିସ କର୍ମଚାରୀ ସନ୍ଦେହ ପ୍ରକାଶ କରି ଯୁବକଙ୍କୁ ଅଟକାଇବା ସହିତ ପଚରାଉଚରା କରିଥିଲେ । ପଚରାଉଚରା ବେଳେ ଯୁବକ ଜଣକ ଉକ୍ତ ମୋଟରସାଇକେଲକୁ ଭୁବନେଶ୍ବରର ଜଣେ ବ୍ୟକ୍ତିଙ୍କ ନିକଟରୁ କମ ଦାମରେ କିଣିଥିବା ଦର୍ଶାଇଥିଲେ । ମାତ୍ର ଗାଡିର କାଗଜପତ୍ର ଦେଖାଇ ପାରି ନଥିଲେ କି କ୍ରେତାଙ୍କ ନାମ ଏବଂ ଠିକଣା ଆଦୌ କହିନଥିଲେ । ପୁଲିସ ଏହି ଘଟଣାର ଅଧିକ ତଦନ୍ତ କରୁଥିବା ବେଳେ, ଗାଡ଼ିଟି ଚୋରା ଗାଡ଼ି ଏବଂ ବେଆଇନ ଭାବେ ଚୋରା ଗାଡ଼ି ରଖିଥିବାର ସେ ସ୍ବୀକାର କରିଥିଲେ । ପୁଲିସ ଅଭିଯୁକ୍ତଙ୍କ ନିକଟରୁ ଉକ୍ତ ମୋଟରସାଇକେଲକୁ ଜବତ କରିବା ସହିତ ତାଙ୍କୁ ଗିରଫ କରି କେଶ୍ ନମ୍ବର ୧୬୧/୨୪ ଆଧାରରେ କୋର୍ଟଚାଲାଣ କରିଥିଲେ । ଅଭିଯୁକ୍ତ ଜଣେ ଅଭ୍ଯାସଗତ ଅପରାଧୀ ଥିବା ଏବଂ ତାଙ୍କ ନାମରେ ପୂର୍ବରୁ ମଧ୍ୟ ବିଭିନ୍ନ ଥାନାରେ ୧୦ ଟିରୁ ଅଧିକ ଅପରାଧିକ ମାମଲା ରହିଥିବା ତଦନ୍ତରୁ ଜଣାପଡିଛି । ଜଟଣୀରୁ ରଙ୍ଗନାଥ ବେହେରାଙ୍କ ରିପୋର୍ଟ,୧୩/୪/୨୦୨୪----୭,୨୦ Sakhigopal News,13/4/2024
