ବାତ୍ୟାର ମୁକାବିଲା ପାଇଁ ଡେଲାଙ୍ଗ ବ୍ଳକ ପ୍ରଶାସନ ପକ୍ଷରୁ ପାକ୍ ପ୍ରସ୍ତୁତି ବୈଠକ

ଡେଲାଙ୍ଗ -------ପୁରୀ ଜିଲ୍ଲାପାଳଙ୍କ ନିର୍ଦ୍ଦେଶ କ୍ରମେ ଡେଲାଙ୍ଗ ବ୍ଳକ ପରିସରରେ ଥିବା ବିଜୁ ପଟ୍ଟନାୟକ ସମ୍ମଳନୀ କକ୍ଷରେ ସମ୍ଭାବ ବାତ୍ୟା ମୁକାବିଲା ପାଇଁ ଡେଲାଙ୍ଗ ବ୍ଳକ ପ୍ରଶାସନର ପାକ୍ ପ୍ରସ୍ତୁତି ବୈଠକ ଅନୁଷ୍ଠିତ ହୋଇଯାଇଛି । ବ୍ଳକ ଅଧ୍ୟକ୍ଷ ପ୍ରସନ୍ନ ସାହୁ ଏହି ବୈଠକରେ ଅଧ୍ୟକ୍ଷତା କରିଥିଲେ । ବାତ୍ୟାର ସଠିକ ମୁକାବିଲା କରିବା ପାଇଁ ଡେଲାଙ୍ଗ ବ୍ଳକ ପ୍ରଶାସନ ସଜାଗ ରହିବା ପାଇଁ ତହସିଲଦାର ମହେନ୍ଦ୍ର ବଡାଇ ଉପସ୍ଥିତ ଥିବା ସମସ୍ତ ଅଧିକାରୀ ଓ ଜନପ୍ରତିନିଧି ମାନଙ୍କୁ କହିଥିଲେ । ତାଙ୍କ ତରଫରୁ ସମସ୍ତ ଆରଆଇ ସକ୍ଳଲରେ ପଲିଥିନ ମହଜୁଦ ରଖାଯିବା ସହ ଶୁଖଲା ଖାଦ୍ୟ ରଖିବାର ବ୍ୟବସ୍ଥା କରାଯାଇଛି ବୋଲି ତହସିଲଦାର ଶ୍ରୀ ବଡେଇ କହିଛନ୍ତି । ବ୍ଳକ ବିଡିଓ ଦୀଲିପ କୁମାର ଷଡଙ୍ଗୀ ଏହି ବୈଠକକୁ ପରିଚାଳନା କରିଥିଲେ । ଡେଲାଙ୍ଗ ଥାନା ଆଇଆଇସି ରଶ୍ମି ରଞ୍ଜନ ପଟ୍ଟନାୟକ, ଏବିଡିଓ ପ୍ରଦୀପ୍ତ ନାୟକଙ୍କ ସହିତ ଯୋଗାଣ ବିଭାଗ, କୃଷିବିଭାଗ, ଜଳସୋଚନ, ସ୍ୱାସ୍ଥ୍ୟ, ଶିକ୍ଷା, ପଶୁ ପାଳନ, ବିଦ୍ୟୁତ, ଅଗ୍ନିଶମ ଆଦି ବିଭାଗର ଅଧିକାରୀ ମାନେ ଉପସ୍ଥିତି ରହିଥିଲେ । ଫନିର ଯେପରି ସଠିକ ମୁକାବିଲା କରାଯାଇଥିଲା ଏହି ବାତ୍ୟାର ମଧ୍ୟ ସଠିକ ମୁକାବିଲା କରାଯିବ ବୋଲି ପଞ୍ଚାୟତ ସମିତି ଅଧ୍ୟକ୍ଷ ଶ୍ରୀ ସାହୁ କହିଛନ୍ତି । ଜନସଚେତନତା ପାଇଁ ବ୍ଳକ ପ୍ରଶାସନ ପକ୍ଷରୁ ଡାକବାଜି ଦ୍ୱାରା ତଳ ଅଞ୍ଚଳରେ ବସବାସ କରୁଥିବା ଲୋକମାନଙ୍କୁ ସଚେତନତା କରାଯିବ ବୋଲି ବିଡିଓ ଶ୍ରୀ ଷଡଙ୍ଗୀଙ୍କ ଠାରୁ ସୁଚନା ମିଳିଛି । ସେହିପରି ବ୍ଳକ ପରିସରରେ ୨୪ ଘଣ୍ଟିଆ କଣ୍ଟୋଲରୁମ ଖୋଲାଯିବ । ଆବଶ୍ୟକ ସ୍ଥଳରେ ଲୋକମାନଙ୍କୁ ବାତ୍ୟା ଆଶୟସ୍ଥଳ, ବିଦ୍ୟାଳୟ, କଲ୍ୟାଣମଣ୍ଡପ, ରାଜୀବଗାନ୍ଧୀ ଭବନ ଆଦି ସ୍ଥାନକୁ ଉଠାଯିବାର ବନ୍ଦୋବସ୍ଥ କରାଯିବ ବୋଲି ତହସିଲଦାର କହିଛନ୍ତି । ଅନ୍ୟ ପକ୍ଷେ ଅସ୍ଥାୟୀ ବାତ୍ୟା ଆଶ୍ରୟସ୍ଥଳୀରେ ପାନୀୟ ଜଳ, ଜେନେରେଟର ବ୍ୟବସ୍ଥା କରିବାକୁ ସରପଞ୍ଚ ମାନଙ୍କୁ କୁହାଯାଇଛି ।