ବରାତି ବାଣ ପଡି ଜଳିଗଲା ପାଳଗଦା; ଅଳ୍ପକେ ବତ୍ତିଗଲେ ପଡାବାସୀ

ଅତାବିରା--- ସମ୍ବଲପୁର  ବରମ୍ପପୁରାରୁ ଏକ ବରାତି ଅତାବିରା ବ୍ଳକର ଲହଣ୍ଡା ଗ୍ରାମ ପଞ୍ଚାୟତର ନିଲେଇପାରି ସ୍ଳୁଲ ପଡା ଅଭିମୁଖେ ଯାଉଥିଲା  । ସେମାନେ ବାଣ ଫୁଟାଇ ବାଜା ବଜାଇ ନାଚ ମଜାମଜଲିସିରେ ଯାଉଥିଲେ  । ମାତ୍ର ସେମାନେ ମାରୁଥିବା ବାଣ ନିଆଁ ପଡି ଗୋପାଳକ ଚକ୍ରଧର ଭୋଇଙ୍କର ଏକ ବିରାଟ ପାଳଗଦା ଜଳି ଯାଇଛି । ଖରା ପ୍ରବଳ ଯୋଗୁ ପାଳ ଗଦାଟି ସମ୍ପର୍ଣ୍ଣ ଶୁଖିକି ରହିଥିଲା  । ବାଣ ନିଆଁ ପଡିବା ମାତ୍ରେ ପାଳଗଦାଟି ହୁ ହୁ ହୋଇ ଜଳି ଉଠିଥିଲା  । ଗାଁ ଲୋକମାନେ ନିଆଁକୁ ଆୟତ୍ତ କରିବାକୁ ଚେଷ୍ଟା କରିଥିଲେ ମଧ୍ୟ ସେଥିରେ ବିଫଳ ହେବାରୁ ଅତାବିରା ଦମକଳ କେନ୍ଦ୍ରକୁ ଖବର ଦିଆଯାଇଥିଲା  ।ସେମାନେ ଅନ୍ୟ ଏକ ଅଗ୍ନିକାଣ୍ଡ ଘଟଣାରେ ଯାଇଥିବାରୁ ବୁର୍ଲା ଅଗ୍ନିଶମ କେନ୍ଦ୍ରକୁ ଖବର ଦିଆଯାଇଥିଲା  । ବୁର୍ଲା ଅଗ୍ନିଶମ ବିଭାଗ ଘଟଣା ସ୍ଥଳରେ ପହଞ୍ଚି ନିଆଁକୁ ଆୟତ୍ତ କରିଥିଲେ  । ମାତ୍ର ପାଳଗଦା ବଡ ହୋଇଥିବାରୁ ତାହା ମଧ୍ୟରେ ନିଆଁ ରହିଯାଇଥିଲା  । ଖରାତାତି ହେବା ପରେ ଭିତରେ ଭିତରେ ନିଆଁ କୁହୁଳି କୁହୁଳି ଜଳି ଉଠିଥିଲା  ।  ବର୍ଷାଦିନରେ ଗୋରୁଙ୍କ ପାଇଁ  ଚକ୍ରଧର  ପ୍ରାୟ ୧୨ ଏକର ଜମିର ପାଳଗଦା କରି ରଖିଥଲେ  । ଏବେ ସବୁ ଜଳି ଗଲାପରେ ଚକ୍ରଧର ଚିନ୍ତାରେ ବର୍ଷା ଦିନରେ ଗୋରୁ ଖାଇବେ କ’ଣ  । ସରକାର ନଜର ଦେବାକୁ ଚକ୍ରଧର ନାଦୀ କରିଛି  ।
ବରଗଡରୁ ନବୀନ କୁମାର ଦାଶ