ନକଲି ବିଦେଶୀ ମଦ କାରବାର ; ୫ ଗିରଫ , ବହୁ ପରିମାଣର ମଦ ଜବତ

ଭଞ୍ଜନଗର--- ବିଦେଶୀ ମଦରେ ମାରାତ୍ମକ ରସାୟନିକ ଦ୍ରବ୍ୟ ପ୍ରୟୋଗ । କମ୍ ଖର୍ଚ୍ଚରେ ପୁଳା ପୁଳା ଟଙ୍କା ରୋଜଗାର । ଗଂଜାମ ଓ କନ୍ଧମାଳ ଜିଲ୍ଲାର କିଛି ସ୍ଥାନରେ ଚାଲିଥିଲା ଏହି କୁଟୀର ଶିଳ୍ପ । ପିଲା ଓ ମହିଳା ମାନେ ଏହାକୁ ଘରେ ପ୍ରସ୍ତୁତ କରି ବଜାରରେ ବିକ୍ରୀ କରୁଥିଲେ । ଦେଖିବାକୁ ଅବିକଳ ବିଦେଶୀ ମଦ ଭଳି । ଏହକୁ ବିଭିନ୍ନ ସମୟରେ ଦାମୀ କାର୍ରେ ଚାଲାଣ କରୁଥିଲେ । ଶେଷରେ ପୋଲିସ ହାତରେ ଧରାପଡିଲେ ଏହି ଗ୍ୟାଙ୍ଗର ସଦ୍ଯସମାନେ । ଗଂଜାମ ଜିଲ୍ଲା ଗାଙ୍ଗପୁର ଥାନା ପୋଲିସ ଗାଡି ଯାଞ୍ଚ୍ ବେଳେ , ଏମାନଙ୍କୁ ଧରିବାରେ ସଫଳ ହୋଇଛି । ସେମାନଙ୍କ ଠାରୁ ବହୁ ପରିମାଣର ନକଲି ବିଦେଶୀ ମଦ ସହ , ଜଣେ ମହିଳା ସମେତ ୫ ଜଣଙ୍କୁ ଗିରଫ କରିଛି ପୋଲିସ ।

ସେମାନଙ୍କୁ ଜେରା ପରେ , ଥାନାଧିକାରୀ ଧିରେଶ କୁମାର ଦାସ ଙ୍କ ନେତୃତ୍ବରେ ବିଭିନ୍ନ ସ୍ଥାନରେ ପ୍ରସ୍ତୁତ କରୁଥିବା ନକଲି ମଦ ଗୋଦାମ ଉପରେ ଚଢ଼ାଉ କରାଯାଇଛି । ବହୁ ପରିମାଣର କେମିକାଲ , ଖାଲି ମଦ ବୋତଲ , ବୋତଲ-ଠିପି , ଷ୍ଟିକର , ଏବଂ ମଦ ପ୍ରସ୍ତୁତ ସାମଗ୍ରୀ ଜବତ କରାଯାଇଛି । ଏହି ନକଲି ମଦ ପ୍ରସ୍ତୁତ ଗ୍ୟାଙ୍ଗ ରେ ଗଂଜାମ ଓ କନ୍ଧମାଳ ଜିଲ୍ଲାର ଲୋକେ ସଂପୃକ୍ତ ଥିବା ନେଇ ଭଂଜନଗର ଏସଡିପିଓ ଶୁଭ୍ରାଂଶୁ ଶେଖର ମିଶ୍ର ସୂଚନା ଦେଇଛନ୍ତି । ଏହି ନକଲି ମଦ ପ୍ରସ୍ତୁତ ଓ କାରବାର ର ଚେର ଖୋଜିବା ଆରମ୍ଭ କରିଛି ପୋଲିସ।