ଗତବର୍ଷ ବୁଡାଇଲା ଫନି ,ଏ ବର୍ଷ କରୋନା ; ଚିନ୍ତାରେ ଚାଷୀ

ବେଗୁନିଆ----  ରବିବାର ଦିନ ଥିଲା ଅକ୍ଷିମୁଠି ଅନୁକୂଳ,  କିନ୍ତୁ ସେଥିପାଇଁ କିଛି ପ୍ରସ୍ତୁତି  ନଥିଲା । କରୋନା  କଟକଣା ଯୋଗୁଁ ଚାଷୀ କିପରି ଚାଷକାର୍ଯ୍ୟ ଆରମ୍ଭ କରିବ ସେଥିପାଇଁ  ଚିନ୍ତାରେ ବସିଛି ।  ଗୋଟିଏ ପଟେ ରବି ଫସଲ ଅମଳ ହୋଇପାରି ନାହିଁ । ଯେତିକି ବି ଅମଳ ହୋଇଛି ତାହା ବିକ୍ରୀ ହୋଇ ପାରିନାହିଁ । ତେଣୁ କେଉଁ ଭରଷାରେ ପୁଣି  ଖରିଫ  ଚାଷ କରିବ ସେ ନେଇ ପ୍ରଶ୍ନ ଉଠାଇଛନ୍ତି  ବ୍ଲକର ଶତାଧିକ ଚାଷୀ । ବ୍ଲକର କେତେ ଜମିରେ ଚାଷ ହେବ ଓ କେତେ ଧାନ ବିହନ,ସାର ଆବଶ୍ୟକ ପଡିବ ସେ ନେଇ ପ୍ରଶାସନିକ ସ୍ତରରେ କିଛି ଆଲୋଚନା ହୋଇନାହିଁ ।ଚାଷୀ ଅମଳ କରୁଥିବା ପନି ପରିବା ଫସଲସବୁକୁ ପ୍ରକୃତ ମୂଲ୍ୟ ନ ପାଇ ଶାଗ ମାଛ ଦରରେ ବିକ୍ରୀ କରୁଥିବା ଯୋଗୁଁ  ଚଳିତ ବର୍ଷ ଚାଷକାର୍ଯ୍ୟ ପ୍ରଭାବିତ ହେବାର ଯଥେଷ୍ଟ ସମ୍ଭାବନା ରହିଛି । କରୋନା ପାଇଁ ସାମାଜିକ ଦୂରତ୍ୱକୁ ପ୍ରାଧାନ୍ୟ ଦେଇ କୃଷି ବିଭାଗ ପକ୍ଷରୁ କୌଣସି ଗ୍ରାମରେ ସଚେତନତା କାର୍ଯ୍ୟକ୍ରମ ହୋଇପାରି ନାହିଁ ।   ବେଗୁନିଆ ବ୍ଲକର ପରିଛଳ ଗ୍ରାମରେ ୨୮ ଗୋଟି ବୋରୱେଲରେ ୧୫୦ ଏକର ଜମିରେ ୧୫୦ ଜଣ ଚାଷୀ ଟମାଟ,ବାଇଗଣ,କୋବି,କାକୁଡି,କଲରା,ବାଇଗଣ କଖାରୁ ଓ ମିଠାମକା ଚାଷ କରିଥିବା ବେଳେ ସମସ୍ତ ପରିବାକୁ ପ୍ରକୃତ ମୂଲ୍ୟଠାରୁ କମଦରରେ ବିକ୍ରୀ ହେଉଥିବାର ଦେଖିବାକୁ ମିଳୁଛି । ପରିଛଳ ସହିତ ଗଡମାଣିତୀର,ଶଗଡଭଙ୍ଗା,ମାନପୁର,ସିକୋ, ହଜରେ ଥିବା ଚାଷୀମାନଙ୍କ ନିକଟରୁ ପ୍ରାୟ ହଜାର ହଜାର କୁଇଣ୍ଟାଲ କଖାରୁ ବିକ୍ରି ହୋଇ ନପାରି ପଚିସଢି ନଷ୍ଟ ହେବାକୁ ବସିଛି ।   ସରକାର ବିହନ ଓ ସାର  ଯୋଗାଇ ପାରିଲେନି ଚାଷୀ ତା ପାଖରେ ରଖିଥିବା ବିହନ ବା ଘରୋଇ ସଂସ୍ଥାଠାରୁ  ଉଚ୍ଚ ଦରରେ ବିହନ ଆଣୁଛି ।ବର୍ତମାନ ଲକଡାଉନ ଯୋଗୁ ଚାଷକାର୍ଯ୍ୟ ସମ୍ପୂର୍ଣ୍ଣ  ପ୍ରଭାବିତ ହୋଇଥିବାରୁ ସରକାର ଚାଷୀମାନଙ୍କୁ ସହାୟତା ଯୋଗାଇ ଦେବା ପାଇଁ ଦାବୀ ହେଉଛି ।
 ବେଗୁନିଆରୁ ଯୋଗେଶ୍ୱର ପଣ୍ଡା