ହରିଆବୁଡା ମେଳଣ ଅନୁଷ୍ଠିତ

ସାକ୍ଷୀଗୋପାଳ ---- ସତ୍ୟବାଦୀ ବ୍ଳକ ବଳପୁର ଗ୍ରାମ ପଞ୍ଚାୟତରେ ପୂଜିତ ହୋଉଥିବା ହରିଆବୁଡା ବା (ହରିସହଦେବ)ଙ୍କ ପୀଠରେ ଗୁରୁବାର ମେଳଣ ଅନୁଷ୍ଠିତ ହୋଇଯାଇଛି ।  ମେଳଣର ଥାନାପତି ବଳପୁର ପଣ୍ଡା ସାହିର ଭଗବତ ବାସୁଦେବ ବିମାନ ସୁସଜିତ ହୋଇ  ପ୍ରଥମେ ମେଳଣ ପଡିଆରେ ଖୁଣ୍ଠିଲାଗି ହୋଇଥିଲେ  । ପରେ ପରେ ନିମନ୍ତ୍ରିତ ହୋଇଥିବା ଠାକୁରଙ୍କ ବିମାନ ଗୁଡିକ ମେଳଣ ପଡିଆରେ ପ୍ରବେଶ କରିଥିଲେ  । ମେଳଣରେ ଆନନ୍ଦପୁର, ବଁପାଳ, ଦୁହୁଡିସାହି, ବେହେରାସାହି, କୁସୁମେଶ୍ୱର, ମୁଦୁଲିସାହି ର ଭଗବତ ବାସୁଦେବ ବିମାନ ଗୁଡିକ ସୁ ସଜିତ ହୋଇ ମେଳଣରେ ଅଂଶଗ୍ରହଣ କରିଥିଲେ  ।  ଆସିଥିବା ଠାକୁର ମାନଙ୍କୁ ମେଳଣ କମିଟି ପକ୍ଷରୁ ପ୍ରତି ଠାକୁରଙ୍କୁ ଭୋଗ ଆଟିକା ଓ ସନମାନ ପ୍ରଦାନ କରାଯାଇଥିଲା  । ଏହି ଅବସରରେ ମେଳଣ ପଡିଆରେ ଦେକାନ ବଜାର ଖୋଲିଥିଲା  ।  ବିଶେଷ କରି ଫାଷ୍ଟଫୁଡ, ଘର ଉପକରଣ ଓ ଜଳଢ଼ଖିଆ ଦେକାନ ମାନଙ୍କରେ କିଣାବିକା ପାଇଁ ଗହଳି ଲାଗିଥିଲା  । ହରିସହଦେବ ଠାକୁର ପୁରୀ ଜିଲ୍ଳାରେ ଗୋରୁ , ଗାଇ ମାନଙ୍କର ଇଷ୍ଟ ବା ଠାକୁର ଭାବରେ ବେଶ ଜଣାଶୁଣା  । ଏଣୁ ଆଜି ବିଭିନ୍ନ ଅଞ୍ଚଳର ମାନସିକ ଧାରୀ ମାନେ ଠାକୁରଙ୍କ ପାଖରେ ଚୁଡାଘଷା, କଦଳୀଚକଟା,ଦୁଧକୁଷୁମା , ଖଇ, କେରା, ନଡିଆ, ଫଳମୂଳ ଆଦି ଭୋଗ କରି ପ୍ରସାଦ ଭାବରେ ପାଇଥାନ୍ତି । ରାତିରେ ମେଳଣ କମିଟି ପକ୍ଷରୁ ସଂକୀର୍ତ୍ତନ, ଭଜନ ସହିତ ଦୁଇଦିନ ଧରି ଅପେରା   ଅନୁଷ୍ଠିତ ହୋଇଥିଲା  । ଶେଷରେ ଆତସବାଜି ପ୍ରଦର୍ଶନୀ କରାଯାଇ ଠାକୁରମାନେ ନିଜ ନିଜ ଗ୍ରାମକୁ ଫେରିଥିଲେ  ।
 ସାକ୍ଷୀଗୋପାଳରୁ ଧୀରେନ୍ଦ୍ର ସେନାପତି