ବରଗଡ଼------ ବରଗଡ଼ ଜିଲ୍ଲା ଅତାବିରା ବ୍ଲକ ଅନ୍ତର୍ଗତ ରେଙ୍ଗାଲିକେମ୍ପ ଛକ ସ୍ଥିତ ସରକାରୀ କେନାଲ ବିଭାଗ ପରିସରରେ ମା ଜଗତଜନନୀ ଶ୍ୟାମାକାଳୀ ପୂଜା ପାଇଁ କଳସ ଶୋଭଯାତ୍ରା ଅନୁଷ୍ଠିତ ହୋଇଯାଇଛି । ଘଣ୍ଟବାଦ୍ୟ,ଗଣ୍ଡା ବାଜା ସହ ଆଖପାଖ ଅଞ୍ଚଳର ହଜାର ହଜାର ଶ୍ରଦ୍ଧାଳୁ ମହିଳା ଭକ୍ତମାନେ କେମ୍ପ ଛକରୁ ଟାଙ୍ଗରପାଲି ରାସ୍ତାରେ ଥିବା ରେଲୱେ କ୍ରସିଂ ନିକଟରେ ଥିବା କେନାଲ ଘାଟ ଠାରେ ପହଞ୍ଚିଥିଲେ । ବିଧି ପୂର୍ବକ ପଣ୍ଡିତ ଅଚ୍ୟୁତାନନ୍ଦ ଶତପଥିଙ୍କ ଦ୍ୱାରା ପୂଜାର୍ଚ୍ଚନା କରି ମାନସିକ କଳସ ମୁଣ୍ଡାଇ ମା କାଳୀଙ୍କ ପୀଠ ପର୍ଯ୍ୟନ୍ତ ଶୋଭଯାତ୍ରା ହୋଇଥିଲା । ଏସଡ଼ିଓ ରବୀନ୍ଦ୍ର କୁମାର ସେଠୀ,ସଂପାଦକ କନିଷ୍ଠ ଯନ୍ତ୍ରୀ ସୁକାନ୍ତ ନାଏକ,କୋଷାଧକ୍ଷ ଅରୁଣ ହୋତା,ବୁର୍ଲା ଜଳସେଚନ ବିଭାଗର ନିର୍ବାହୀ ଯନ୍ତ୍ରୀ ରାଜ କିଶୋର ଘଡେଇ ଓ ବୁର୍ଲା ମେନ ଡ୍ୟାମ ନିର୍ବାହୀ ଯନ୍ତ୍ରୀ ନିରାକାର ବିଶିଙ୍କ ତତ୍ୱାବଧାନରେ ଶୋଭଯାତ୍ରା ହୋଇଥିଲା । ସରକାରୀ କନିଷ୍ଠ ଯନ୍ତ୍ରୀ ରାଜକିଶୋର ମୁର୍ମୁ ଓ ତାଙ୍କ ଧର୍ମ ପତ୍ନୀ ଆଶୁଳତା ମୁର୍ମୁ କର୍ତ୍ତା କର୍ତ୍ତୀ ଭାବେ ଦାୟିତ୍ଵ ତୁଲାଇଥିଲେ । ମୁଖ୍ୟ ପୂଜକ ଭାବରେ ପଣ୍ଡିତ ଅଚ୍ୟୁତାନନ୍ଦ ଶତପଥି,ଚଣ୍ଡି ସାଧକ ପ୍ରଭାକର ଶତପଥି ଓ ତାଙ୍କ ସହଯୋଗୀ ପୂଜାକାର୍ଯ୍ୟ ତୁଲାଇଛନ୍ତି।ଅନେକ ଶ୍ରଦ୍ଧାଳୁ ଭକ୍ତମାନେ ସକାଳୁ ଆସି ମା କାଳୀଙ୍କ ଠାରେ ଦ୍ବୀପ ପ୍ରଜ୍ବଳନ କରି ନିଜର ମାନସିକ କରିଥିଲେ। ସନ୍ଧ୍ୟା ସମୟରେ ଆଲୋକ ସାଜସଜ୍ଜାରେ ଝଲସି ଉଠିଥିଲା ମା ଙ୍କ ପୀଠସ୍ଥଳୀ। ମାନସିକଧାରୀଙ୍କ ଭିଡ଼ ତ ଲାଗି ରହିଥିଲା ତା ସାଙ୍ଗକୁ ମିନାବଜାର ଭିଡ଼ ମଧ୍ୟ ଦେଖିବାକୁ ମିଳିଥିଲା।ଏଠାରେ ଯିଏ ଯାହା ମାନସିକ କରିଥାନ୍ତି ତାହା ମା ପୂରଣ କରୁଥିବାରୁ ଶ୍ରଦ୍ଧାଳୁ ମାନଙ୍କ ମଧ୍ୟରେ ବିଶ୍ବାସ ରହିଛି । ଏହି କାର୍ଯ୍ୟକ୍ରମକୁ ରେଙ୍ଗାଳିପାଲି,ଦେବାହାଲ,ଜଂହାପଡା,ଦାସ ପଡା ତଥା ଆଖପାଖ ଗ୍ରାମର ଭଦ୍ରବ୍ୟକ୍ତି ଓ ଅବସର ପ୍ରାପ୍ତ କର୍ମଚାରୀ ମାନଙ୍କ ପୂର୍ଣ୍ଣ ସହଯୋଗ ରହିଛି । ବରଗଡ଼ ଜିଲ୍ଲାରୁ ନବୀନ ଦାଶଙ୍କ ରିପୋର୍ଟ
