ପୁରୀ ଜିଲ୍ଲା ଜଜ୍ କୋର୍ଟରେ ୩୦ ଅସ୍ଥାୟୀ କର୍ମଚାରୀ ନିଯୁକ୍ତି ନେଇ ବ୍ୟାପକ ଅନିୟମିତତା ଅଭିଯୋଗ

କୋଣାର୍କ, ---

ପୁରୀ ଜିଲ୍ଲା ଜଜ୍ କୋର୍ଟରେ ୩୦ ଅସ୍ଥାୟୀ କର୍ମଚାରୀ ନିଯୁକ୍ତି ନେଇ ବ୍ୟାପକ ଅନିୟମିତତା ଅଭିଯୋଗ ହୋଇଛି। ଘଟଣା ରୁ ପ୍ରକାଶ ଯେ ଗତ ୨୨ ତାରିଖରେ ପୁରୀ ଜିଲ୍ଲା ଜଜ୍ କୋର୍ଟ ପକ୍ଷରୁ ରେଜିଷ୍ଟ୍ରାର ସିଭିଲ କୋର୍ଟ ତିରିଶଟି ଦୈନିକ ମଜୁରୀ ଭିତ୍ତିକ ଶାରୀରିକ ସକ୍ଷମ ଶ୍ରମିକଙ୍କ ଆବଶ୍ୟକତା ଓ ଅସ୍ଥାୟୀ ନିଯୁକ୍ତି ନେଇ ଏକ ବିଜ୍ଞପ୍ତି ଜାରୀ କରିଥଲେ । ନିଯୁକ୍ତି ହେବାକୁ ଥିବା ଏହି କର୍ମଚାରୀମାନେ ପୁରୀ ଜିଲ୍ଲାର ପୁରୀ ସଦର,ନିମାପଡ଼ା,ପିପିଲି, କୋଣାର୍କ,କଣାସ ଓ ବ୍ରହ୍ମଗିରି ଠାରେ ଅବସ୍ଥିତ ସମସ୍ତ ଅଦାଲତ କାର‌୍ୟ୍ୟାଳୟରେ ଯୋଗ ଦେବା ପାଇଁ କୁହାଯାଇଥିଲା। ଇଚ୍ଛୁକ ପ୍ରାର୍ଥୀ ସର୍ବନିମ୍ନ ୧୮ ବର୍ଷ ହେବା ଆବଶ୍ୟକତା ଅଛି ବୋଲି କୁହାଯାଇଥିଲା।କିନ୍ତୁ ଏହି ବିଜ୍ଞପ୍ତି ନେଇ ଆବେଦନର ସମୟ ଅତି କମ୍ ଅର୍ଥାତ୍ ମାତ୍ର ସାତ ଦିନ ରଖାଯାଇଥିବାରୁ ସାଧାରଣରେ ତୀବ୍ର ଅସନ୍ତୋଷ ପ୍ରକାଶ ପାଇଥିଲା।ଏଥି ସହିତ ଏହାକୁ ଅତି ଗୋପନୀୟ ଭାବେ କେବଳ ଅଫିସ୍ ନୋଟିସ୍ ବୋର୍ଡ଼ ରେ ମାରିବା ସହିତ କୌଣସି ଦୈନିକ ଖବରକାଗଜରେ ପ୍ରକାଶିତ ହୋଇନଥିବାରୁ ତୀବ୍ର ଅସନ୍ତୋଷ ପ୍ରକାଶ ପାଉଛି।ବିଜ୍ଞପ୍ତି ରେ କୌଣସି ନମ୍ବର ନଥିବା ସହିତ ଜନସାଧାରଣରେ ବିଧିବଦ୍ଧ ଭାବେ ପ୍ରକାଶିତ ହୋଇନଥିବାରୁ ବହୁତ ଯୋଗ୍ୟ ପ୍ରାର୍ଥୀ ନଜାଣି ପାରି ଆବେଦନ କରିବାରୁ ବଞ୍ଚିତ ହୋଇଥିବାର ଜଣାଯାଇଛି।ଆହୁରି ମଧ୍ୟ ଏହି କର୍ମଚାରୀ ମାନେ କେଉଁ କେଉଁ କାର‌୍ୟ୍ୟ ରେ ନିୟୋଜିତ ହେବେ,ତାହା ମଧ୍ୟ ବିଜ୍ଞପ୍ତି ରେ ଦର୍ଶାଯାଇନାହିଁ।ଇତିମଧ୍ୟରେ, ଆବେଦନ କରିଥିବା ପ୍ରାର୍ଥୀ ମାନଙ୍କୁ ଅତି ତରବରିଆ ଭାବରେ ସାକ୍ଷାତକାର ସମ୍ପୂର୍ଣ୍ଣ କରାଯାଇଛି। ସବୁଠୁ କୌତୁହଳର ବିଷୟ,ଏହି ଦୈନିକ ମଜୁରୀ ଭିତ୍ତିକ ଶ୍ରମିକ ପ୍ରାର୍ଥୀମାନଙ୍କୁ ସାକ୍ଷାତକାର ସମୟରେ କେବଳ ଜାତୀୟ ଓ ଆନ୍ତର୍ଜାତୀୟ ଖାଦ୍ୟ ପ୍ରସ୍ତୁତି ବିଷୟରେ ପଚରାଯାଇଥିବା କଥା ସାଧାରଣରେ ଚର୍ଚ୍ଚାର ଖୋରାକ୍ ଯୋଗାଇଛି।ନ୍ୟାୟ ପାଲିକା ରେ ସ୍ୱଚ୍ଛତା ବଜାୟ ରଖିବା ପାଇଁ, ଉପରୋକ୍ତ ତ୍ରୁଟି ସବୁକୁ ସୁଧାରି ,ଏହି ନିଯୁକ୍ତି ପ୍ରକ୍ରିୟା କୁ ତୁରନ୍ତ ରଦ୍ଦ କରି , ପୁର୍ନବାର ବିଧିବଦ୍ଧ ଭାବରେ ବିଜ୍ଞାପନ ପ୍ରକାଶିତ କରିବାକୁ ସାଧାରଣରେ ଦାବି ହେଉଛି। କୋଣାର୍କ ରୁ ଅଜିତ ମଲିକଙ୍କ ରିପୋର୍ଟ,୨୦/୯/୨୦୨୪----୮,୪୫ Sakhigopal News, 20/9/2024