ବିଚ୍ ରାସ୍ତାରେ ଦମ୍ପତ୍ତି କୁ ମାଡ଼ମାରି ସୁନା ଅଳଙ୍କାର , ଟଙ୍କା ଓ ବାଇକ୍ ଛଡ଼ାଇ ନେଲେ ଦୁର୍ବୃତ୍ତ

ଭଞ୍ଜନଗର----    ଭଞ୍ଜନଗର - ରାସ୍ତାରେ ଗାଡ଼ିକୁ ଅଟକାଇ ଦମ୍ପତ୍ତିଙ୍କୁ ମାଡମାରି ଟଙ୍କା , ସୁନା ଅଳଙ୍କାର ଏବଂ ବାଇକ୍ କୁ ଲୁଟି ନେଲେ ୫ ଦୁର୍ବୃତ୍ତ । ଗଞ୍ଜାମ ଜିଲ୍ଲା ତାରାସିଙ୍ଗି ଥାନା ଅନ୍ତର୍ଗତ ଭଞ୍ଜନଗର – ଦଶପଲ୍ଲା ରାସ୍ତାର ଲେମ୍ଭେଇ ଗାଁ ନିକଟରେ ଘଟିଛି ଏଭଳି ଏକ ଘଟଣା । ଦୁର୍ବୃତ୍ତଙ୍କ ଆକ୍ରମଣର ଶିକାର ହୋଇଥିବା ସମ୍ପୁକ୍ତ ବ୍ୟକ୍ତି  ଗୁରୁତର ଅବସ୍ଥାରେ ଭଞ୍ଜନଗର ମେଡିକାଲରେ ଭର୍ତ୍ତି ହୋଇଥିଲେ । ଆହତ ଜଣକ ନିକଟସ୍ଥ ଗରଡପଥର ଗାଁର ଶ୍ରୀକାନ୍ତ ସେଠୀ । ଶ୍ରୀକାନ୍ତ ଏବଂ ତାଙ୍କ ସ୍ତ୍ରୀ ନର୍ମଦା  ସେଠୀ , ଦୁହେଁ ବାଇକ୍ ଯୋଗେ ଭଞ୍ଜନଗର ନିକଟସ୍ଥ କୁଲାଡ ରୁ ସଉଦା କିଣି ନିଜ ଗାଁ ଗରଡପଥର କୁ ଯାଉଥିଲେ । ଯିବା ରାସ୍ତାରେ ଲେମ୍ଭେଇ ଗାଁ ନିକଟରେ ୫ ଜଣ ଦୁର୍ବୃତ୍ତ ତାଙ୍କ ବାଇକ୍ କୁ ଅଟକାଇ କାଠ ଫାଳିଆ ରେ ମାଡ଼ ମାରିଥିଲେ । ସେମାନେ ଧରିଥିବା ପ୍ରାୟ ୧୦ ହଜାର ଟଙ୍କା , ମୋବାଇଲ, ବାଇକ୍ ଏବଂ ସ୍ତ୍ରୀ ପିନ୍ଧିଥିବା ମଙ୍ଗଳସୂତ୍ର ଏବଂ ସୁନା କାନଫୁଲ ଛଡ଼ାଇ ନେଇଥିଲେ  ।  ଦିନ ଦ୍ବିପହରରେ ଲୁଟ୍ ପାଟ୍ କରି , ଘଟଣାସ୍ଥଳରୁ ଚମ୍ପଟ ମାରିଥିଲେ ସମସ୍ତ ଦୁର୍ବୃତ୍ତ । ଆହତ ଅବସ୍ଥାରେ ଘଟଣା ସ୍ଥଳରେ ପଡ଼ିଥିବା ଶ୍ରୀକାନ୍ତ ଙ୍କୁ ସ୍ଥାନୀୟ ଲୋକେ ଉଧାର କରି ଆମ୍ବୁଲାନ୍ସ ଯୋଗେ ଭଞ୍ଜନଗର ମେଡିକାଲରେ ଭର୍ତ୍ତି କରିଥିଲେ । ଖବର ପାଇ ତାରାସିଙ୍ଗି ଥାନା ପୋଲିସ ଘଟଣାର ତଦନ୍ତ ଆରମ୍ଭ କରିଛି । ଆହତଙ୍କ ସ୍ତ୍ରୀ ଦେଇଥିବା ସୂଚନା ପ୍ରକାରେ ସମ୍ପୁକ୍ତ ଅଭିଯୁକ୍ତମାନେ ନିକଟସ୍ଥ ବାରଦଣ୍ଡା ଗାଁ ର । ଏହାସହ କୌଣସି ଏକ ପୂର୍ବ ଶତ୍ରୁତାକୁ କେନ୍ଦ୍ରକରି  ଏଭଳି ଆକ୍ରମଣ ଓ ଲୁଟ୍ କରିଥିବା ଅଭିଯୋଗ କରିଛନ୍ତି ଆହତଙ୍କ ସ୍ତ୍ରୀ ନର୍ମଦା । ତେବେ କିଛି ଦିନର ନୀରବତା ପରେ ବିଚ୍ ରାସ୍ତାରେ ଏବଂ ଦିନ ଦ୍ବିପହରରେ ଏଭଳି ଘଟଣା ଘଟିବାକୁ ନେଇ ସ୍ଥାନୀୟ ଲୋକେ ଏବେ ଭୟଭୀତ ହୋଇପଡିଛନ୍ତି । ଭଞ୍ଜନଗରରୁ ରବିନ୍ଦ୍ର ପ୍ରଧାନଙ୍କ ରିପୋର୍ଟ,୧୧/୧୧/୨୦୨୩---୮,୨୦ Sakhigopal News,11/11/2023