ଜଗନ୍ନାଥଙ୍କ ପରମ ଭକ୍ତ ଦାସିଆଙ୍କ ଜନ୍ମ ଉତ୍ସବ ପାଳିତ

Delang 

ଡେଲାଙ୍ଗ ---- କାର୍ତ୍ତିକ ଶୁକ୍ଳପକ୍ଷ ବଡ ଏକାଦଶୀ ତିଥିରେ ତେଇଶିପୁର ସ୍ଥିତ ବାଲିଗାଁ ଦାସିଆପୀଠ ପରିସରରେ ଶୁକ୍ରବାର ଦିନ ଜଗନ୍ନାଥଙ୍କ ପରମ ଭକ୍ତ ସିରୋମଣି ଦାସିଆ ବାଉରିଙ୍କ ଜନ୍ମ ଉତ୍ସବ ପାଳିତ ହୋଇଯାଇଛି  । ଏଥିଯୋଗୁ ପୀଠ ଚଳଚଞ୍ଚଳ ସହ ଶ୍ରଦ୍ଧାଳୁଙ୍କ ଭିଡ ପରିଲକ୍ଷିତ ହୋଇଛି  ।  ରାଧାମୋହନ ମଠ ଓ ସମ୍ମୁଖରେ ଥିବା ଜଗନ୍ନାଥ ମନ୍ଦିରର ପ୍ରତିଦିନ ଭଳି ସମସ୍ତ  ଦେବନୀତି ସରିବା ପରେ ବେଦପାଠ, ଭାଗବତ ଗୀତାପାଠ, ଅଖଣ୍ଡ ନାମଯଜ୍ଞ କରାଯାଇଥିଲା  । ଦାସିଆ ପୀଠରେ ନୂତନ ବସ୍ତ ଲାଗି କରାଯାଇଥିଲା  । ପ୍ରଥା ଅନୁସାରେ ପୀଠ ତରଫରୁ ଭକ୍ତ ମାନଙ୍କୁ ଅରୁଆ ଚାଉଳରେ ଜାଉ, ଶାଗ  ସହିତ କାଞ୍ଜି ବିତରଣ କରାଯାଇଥିଲା  । କେଉଁ କାଳରୁ ଏହି ପ୍ରଥା ପ୍ରଚଳିତ ହୋଇ ଆସୁଛି  । ଏହି ପ୍ରସାଦ ପାଇବା ପାଇଁ ପୀଠରେ ଭକ୍ତ ମାନଙ୍କର ଗହଳି ଦେଖିôବାକୁ ମିଳିଥିଲା  । ବିଶ୍ୱାସ ଅଛି ଏହି ପ୍ରସାଦ ପାଇଲେ ବିଭିନ୍ନ ରୋଗରୁ ଉପସମ ମିଳିଥାଏ   । ତେବେ ଭକ୍ତ ଦାସିଆ ଶାଗଭଜା , ଜାଉ ଓ କାଞ୍ଜି ଖାଇବାକୁ ଯାଉଥିବା ବେଳେ ସେହି ପାତ୍ରରେ ସ୍ୱୟଂ ପ୍ରଭୁ ଜଗନ୍ନାଥ ତାଙ୍କୁ ଦର୍ଶନ ଦେଇଥିଲେ , ଦାସିଆ ସେହି ଦର୍ଶନ ଦେଖି ଭାବବିହ୍ୱଳ ହୋଇ ପାଗଳପରି ଆଳପ କରିବା ସହ ନାଚିଉଠିଥିଲେ  । ଏହାକୁ ମନେପକାଇ ପାଇଁ ଏଭଳି ପ୍ରସାଦର ସେବନର ଆୟୋଜନ କରାଯାଇଥାଏ ବୋଲି ଦାସିଆ ପୀଠର ସୁରକ୍ଷା ସମିତିର କର୍ମକର୍ତ୍ତା କବୀର    କହନ୍ତି  ।   ସକାଳୁ ସକାଳୁ ଭକ୍ତମାନେ ସ୍ମୁତିପୀଠକୁ ଆସି ଦାସିଆ ବାଉରିଙ୍କ ବୋଞ୍ଜ ନିର୍ମିତ ପ୍ରତିମୂର୍ତ୍ତି ସହ ଚତୁର୍ଦ୍ଧାମୂର୍ତ୍ତି, ରାଧାମୋହନଙ୍କୁ ମଧ୍ୟ ଦର୍ଶନ କରିଥିଲେ  । ପୀଠକୁ ଦର୍ଶନ କରିବାକୁ ଆସିଥିବା ଅନେକ ଭକ୍ତ ନଡିଆ, ଖଇକେରା, କଦଳୀ. ଚୁଡାଘଷା ଆଦି ନବୈଦ୍ୟ ଅର୍ପଣ କରିଥିଲେ  । ଦାସିଆ ବାଉରୀଙ୍କ ଜନ୍ମ ଉତ୍ସବ ଅବସରରେ ସଂକୀର୍ତ୍ତନ ଅନୁଷ୍ଠିତ ହୋଇଥିଲା  । ମାତ୍ର ରାତିରେ  ବିଭିନ୍ନ ସଂସ୍କୃତିକ କାର୍ଯ୍ୟକ୍ରମର ଆୟୋଜନ କରାଯାଇଥବା ବେଳେ ବାତ୍ୟା ବିଲ୍ ବୁଲ୍ ସବୁ ଧୋଇ ନେଇଛି । ଅପରାହ୍ନରୁ ବର୍ଷା ଲାଗି ରହିବାରୁ ସବୁଫିକା ପଡି ଯାଇଥିଲା  । କିବିନ୍ଦ୍ର ବେହେରା ଓ ମନୋରଞ୍ଜନ ପଲେଇ କାର୍ଯ୍ୟକ୍ରମ ପରିଚାଳନା କରିଥିଲେ  ।
 ଡେଲାଙ୍ଗରୁ ଧୀରେନ୍ଦ୍ର ସେନାପତି