ସାକ୍ଷୀଗୋପାଳ ---- ସତ୍ଯବାଦୀ ବ୍ଲକ ଅନ୍ତର୍ଗତ ଘାଷିଭବାନୀପୁର ଗ୍ରାମରେ ଅଗ୍ନି କାଣ୍ଡ ଘଟି ୧୫ ବଖରା ଚାଳଘର ଭସ୍ମିଭୂତ ହୋଇଯାଇଛି । ଶୁକ୍ରବାର ଅପରାହ୍ନ ୨ଟା ବେଳେ ଭଗବାନ ପ୍ରଧାନ ଙ୍କ ଘରେ ଇଲେକ୍ଟ୍ରି ସର୍ଟସର୍କିଟ ହୋଇ ଅଗ୍ନିକାଣ୍ଡ ଘଟିଥିଲା । ହଠାତ୍ ଭୟଙ୍କର ପବନ ବହିବାରୁ ନିଆଁ ପ୍ରବଳ ବେଗରେ ଘରକୁ ଘର ମାଡି ଚାଲିଥିଲା । ଗ୍ରାମବାସୀ ନିଆଁ ଲିଭାଇବାକୁ ଅକ୍ଲାନ୍ତ ପରିଶ୍ରମ କରିଥିଲେ । ଖବରପାଇ ସତ୍ଯବାଦୀ ଅଗ୍ନିଶମ ବିଭାଗ ପକ୍ଷରୁ ଦୁଇଟି ଦମକଳ ସହିତ ଆଗ୍ନିକଙ୍କ ସହିତ ସଦଳବଳେ ଘଟଣା ସ୍ଥଳରେ ପହଞ୍ଚି ନିଆଁକୁ ଆୟତ କରିଥିଲେ । ହଠାତ୍ ନିଆଁ ଲାଗିଯିବାରୁ ଲୋକମାନେ ନିଜ ଘରୁ କିଛି ଜିନିଷ ପତ୍ର ବାହାର କରି ପାରିନଥିଲେ । ଘରେ ଥିବା ଧାନ , ଚାଉଳ , ମୁଗ , ବିରି , ବାସନକୁସନ , ଲୁଗାପଟା ଆଦି ବହୁତ ଆସବାବପତ୍ର ପୋଡି ଛାରଖାର ହୋଇଯାଇଛି । ସ୍ଥାନୀୟ ସରପଞ୍ଚ ଘଟଣା ସ୍ଥଳରେ ପହଞ୍ଚି ଲୋକମାନଙ୍କୁ ସାନ୍ତ୍ବନା ଦେଇଥିଲେ । ଆରଆଇ ଘଟଣା ସ୍ଥଳରେ ପହଞ୍ଚି ଥିଲେ । କ୍ରୁଷ୍ଣଚନ୍ଦ୍ର ପ୍ରଧାନ , ପୂର୍ଣ୍ଣଚନ୍ଦ୍ର ପ୍ରଧାନ , ଭଗବାନ ପ୍ରଧାନ , ଇଶ୍ୱର ପ୍ରଧାନ , ଓକିଲ ପ୍ରଧାନ , କୁମାରୀ ଜେନା , ଜମ୍ୱେଶ୍ୱର ପ୍ରଧାନ , ସହଦେବ ପ୍ରଧାନ ଓ ବିଶ୍ୱନାଥ ଜେନାଙ୍କ ଘରେ ଅଗ୍ନିକାଣ୍ଡ ଘଟିଛି। ବିପନ୍ନ ମାନେ ସାଧାରଣ ଗରିବ ଲୋକ ହୋଇଥିବାରୁ ସେମାନଙ୍କୁ ସରକାରଙ୍କ ପକ୍ଷରୁ ତୁରନ୍ତ ସାହାଯ୍ୟ ଯୋଗାଇ ଦେବା ସହ ପ୍ରଧାନମନ୍ତ୍ରୀ ଆବାସ ଯୋଜନାରେ ଘର ଯୋଗାଇ ଦେବାକୁ ବ୍ଳକ ଅଧ୍ୟକ୍ଷ ସୁନୀଲ କୁମାର ପଣ୍ଡା ଓ ବ୍ଳକ ବିଜେଡି ସଭାପତି ପ୍ରମୋଦ ରାଉତରାୟ ଙ୍କ ସହିତ ପୂର୍ବତନ ପଞ୍ଚାୟତ ସମିତି ସଭ୍ୟ ପ୍ରଶାନ୍ତ ମହାପାତ୍ର ପ୍ରମୁଖ ଦାବି କରିଛନ୍ତି ।
ସାକ୍ଷୀଗୋପାଳ ରୁ ଧୀରେନ୍ଦ୍ର ସେନାପତି ଙ୍କ ରିପୋର୍ଟ,୧/୮/୨୦୨୫----୮,୪୫ Sakhigopal News,1/8/2025
