ସତ୍ୟବାଦୀର ବଳପୁରରେ ଭିନ୍ନ ପରମ୍ପରାରେ ଦଶହରା ପର୍ବ ପାଳିତ; ନଦୀରେ ଚାପ ଖେଳିବା ପରେ ମାଙ୍କ ୁମେଳାଣି

ସାକ୍ଷୀଗୋପାଳ,----  ଦଶହରା ପର୍ବ ପାଳନ ଆନନ୍ଦ ଉଲ୍ଲାସରେ  ବିଭିନ୍ନ ଯାଗାରେ ବିଭିନ୍ନ ପ୍ରକାରରେ ପାଳିତ ହୋଇଯାଇଛି ।  ଦଶହରା ଏକ ଭାଇଚାରର ପର୍ବ । ପିଠା ପଣା ସାଙ୍ଗକୁ  ଘର ମାନଙ୍କରେ ପୁଅ, ଝିଅ ଜୋଇଁ ନାତି ନାତୁଣୀ ମାନଙ୍କର ଗହଳି ଲାଗିଥାଏ  । ଗ୍ରାମରେ ମାଙ୍କ ପାଖରେ ଭୋଜି ଭାତ ସାଙ୍ଗକୁ ଦୁଆରି ଭୋଗ କରାଯାଇଥାଏ । ସେହିପରି ପୁରୀ ଜିଲାର ସତ୍ୟବାଦୀ ବ୍ଳକର ବଳପୁରରେ ଦଶହରା ବା ବିଜୟାଦଶମୀ  ଭିନ୍ନ ପରମ୍ପରାରେ  ପାଳନ କରାଯାଇଥାଏ । ଯାହାକି ଏଠାରେ ପାଳନ କରାଯାଉଥିବା ପ୍ରଥା ଓଡିଶାରେ କେଉଁଠାରେ ଦେଖିବାକୁ ମିଳେ ନାହିଁ ବୋଲି  ବଳପୁର ବାଲୁଙ୍କେଶ୍ୱର ଦେବଙ୍କ ଟ୍ରଷ୍ଟ ପରିଚାଳନା ସଭାପତି ନିରଞ୍ଜନ ମହାପାତ୍ର କହନ୍ତି । ଏଠାରେ ପୁରା ସ୍ୱତନ୍ତ୍ର ଭାବରେ ବିଜୟାଦଶମୀ ପର୍ବ ପାଳନ କରାଯାଇଥାଏ । ବଳପୁର ବାଲୁଙ୍କେଶ୍ୱର ଦେବଙ୍କ ପକ୍ଷରୁ ନିମନ୍ତ୍ରଣ ପାଇ ଆନନ୍ଦପୁର ଓ ବଳପୁର ଗ୍ରାମର ତାରେଣୀ , କୁସୁମେଶ୍ୱର ଗ୍ରାମର ଉଗ୍ରତାରା ଓ ଦିଉଡିସାହିର ଷଷ୍ଠି ଦେବୀ ଷୋଳପୂଜାରେ ବାଲୁଙ୍କେଶ୍ୱର ଦେବଙ୍କ ପୀଠ ପରିସରରେ ଭାଗ ନେଇଥାନ୍ତି । ପ୍ରତ୍ୟେକ ଦିନ ଷୋଡଶ ମନ୍ତ୍ର ଦ୍ୱାରା ଠାକୁରାଣୀ ମାନଙ୍କର ନୀତିକାନ୍ତି କରାଯିବା ସହ ବିଭିନ୍ନ ଭୋଗ କରାଯାଇଥାଏ । ଦଶହରା ଦିନ ଅପରାହ୍ନରେ ଦେବୀ ମାନଙ୍କର ନୀତିକାନ୍ତି ସରିବା ପରେ ଛତି, ତ୍ରାସ ବୈରଖ, ଘଣ୍ଟ, ଘଣ୍ଟା, କାହାଳୀ,ମହୁରୀ,  ବାଜା  ବଯାଇ ସୁସଜିତ ଏକ ବିମାନରେ ବାଲୁଙ୍କେଶ୍ୱରଙ୍କ ଚଳନ୍ତି ପ୍ରତିମା ଶ୍ରୀ ଚନ୍ଦ୍ରଶେଖରଙ୍କ ସହ  ବଳପୁର ଶାସନ, ପଣ୍ଡାସାହି ଓ ବେହେରା ସାହିରେ ଦୁଆରୀ ଭୋଗ ଖାଇଥାନ୍ତି ।   ମାଙ୍କୁ ବିଦାୟ ଦେବାପାଇଁ ପୁଣ୍ୟତୋୟା ଭାର୍ଗବୀ ନଦୀର ସାଗରସ୍ନାନ ଘାଟରେ ଦୁଇଟି ଡଙ୍ଗା ଏକାଠି କରାଯାଇ ମାଙ୍କୁ ବସାଯିବା ପରେ ସେବାୟତ ମାନେ ନୀତି ଅନୁସାରେ ପ୍ରଥମେ ଗଙ୍ଗାଦେବୀଙ୍କୁ ଗଙ୍ଗା ଆଳତୀ କରିଥିଲେ ।  କଥାରେ ଅଛି ଏହି ଦୃଶ୍ୟ ଦେଖିଲେ ବହୁପୁଣ୍ୟ ମିଳିଥାଏ । ଠାକୁରାଣୀ ମାନଙ୍କୁ ନଦୀ ମଧ୍ୟରେ ଚାପ ଖେଳି ଖେଳି ବିଦାୟ ଦେବାର ପରମ୍ପରା ରହିଛି । ସେଠାରେ ଅପେକ୍ଷାରତ ସେବାୟତ ମାନେ ମାଙ୍କୁ ମନ୍ଦିରକୁ ନେବା ସମୟରେ ଦୁଆରୀ ଭୋଗ ଖୁଆଇ ମନ୍ଦିରକୁ ପ୍ରବେଶ କରାଇଥାନ୍ତି । ସେହିପରି ପରମ୍ପରା ଅନୁଯାୟୀ ବରାଳ ବାଲୁଙ୍କେଶ୍ୱର ଦେବଙ୍କ ବିଭୂତି ପାଇଁ  ସେବାୟତ ମାନେ ବିଭୂତି ବାଟିକାରୁ ମାଟି ସଂଗ୍ରହ କରିଥିଲେ । ଏହି ବିଭୂତି ବର୍ଷକୁ ଥରେ ବରାଳ ବାଲୁଙ୍କେଶ୍ୱର ଦେବଙ୍କ  ସେବାୟତ  ମାନେ ବିଜୟାଦଶମୀ ବା ଦଶହରା ଦିନ ସଂଗ୍ରହ କରିବାର ପରମ୍ପରା ରହି ଆସିଛି । ସେହିପରି ସାକ୍ଷୀଗୋପିନାଥ ଦେବ ଗୋପାଳପୁର ପାଟଣା ସ୍ଥିତ ଦଶହରା ମଣ୍ଡପକୁ ବିଜେ କରି ସେଠାରେ ମାଛ ଆଖିକୁ ଲାଖବିନ୍ଦା ନୀତି କରାଯାଇଥାଏ । ପରେ ପରେ ଗ୍ରାମ ମାନଙ୍କରେ ବସିଥିବା ବା ପୂଜା କରାଯାଇଥିବା ଦଶହରା ପର୍ବ ଶେଷ ହୋଇଥାଏ । ସାକ୍ଷୀଗୋପାଳ ମନ୍ଦିର କାର୍ଯ୍ୟନିର୍ବାହୀ ଅଧିକାରୀ ବିଶ୍ୱବାସୀ ତ୍ରିପାଠୀଙ୍କ ତତ୍ୱବଧାନରେ ଠାକୁରଙ୍କ ନୀତିକାନ୍ତି କରାଯାଇଥିଲା ବୋଲି ମନ୍ଦିର ସୁପରଭାଇଜର ବିଶ୍ୱନାଥ ମହାପାତ୍ରଙ୍କ ଠାରୁ ସୁଚନା ମିଳିଛି ।

ସାକ୍ଷୀଗୋପାଳରୁ ଧୀରେନ୍ଦ୍ର ସେନାପତି, ୧୪/୧୦/୨୨୪---୭,୨୫    Sakhigopal News,14/10/2024