କାଳେସିଙ୍କ ଉପରେ ଏବେବି ଅଗାଡ ବିଶ୍ୱାସ ; ମନସ୍କାମନା ପୂର୍ଣ୍ଣ ପାଇଁ ପଡିଲେ ଗୁହାରିଆ , ଅଳଗୁମର ମା ଜାଗେଶ୍ୱରୀଙ୍କ ପ୍ରସିଦ୍ଧ ବାରଦିନ କାଠିଯାତ୍ରା ଶେଷ

 ସାକ୍ଷୀଗୋପାଳ-----   ଯେପରି ଡାକ୍ତର ରୋଗି ପାଇଁ ସବୁ ଚେଷ୍ଟା କରିବା ସତ୍ୱେ ଭଗବାନଙ୍କ ଉପରେ ସବୁକିଛି ଛାଡି ଦେଇଥାନ୍ତି । ଠିକ ସେହିପରି ମଣିଷ ସବୁ ଜାଣିଲା ପରେ ମଧ୍ୟ ସମୟ ଅନୁସାରେ ସବୁକିଛି ସେହି ଠାକୁର ଠାକୁରାଣୀଙ୍କ କାଳେସି ଉପରେ ବିଶ୍ୱାସ ରହିଯାଇଥାଏ । ଆଜିବି ଶ୍ରଦ୍ଧାଳୁ ବା ଭକ୍ତ ମାନଙ୍କ ମନରେ ରହିଛି ଗୋଟେ ମଣିଷ କେବେ ହେଲେ ୨୨ ହାତ ଲମ୍ବାର ଏକ କାଠଦଣ୍ଡ ଉପରେ ଚଡିବା ସମ୍ବବପରନୁହେଁ । କିଛି ଶକ୍ତି ନଥିଲେ କାହାରି ଆଶା ବା ନଧରି ଏତେ ଉଚ୍ଚ କାଠ ଦଣ୍ଡ ଉପରେ ଠିଆ ହୋଇ ଭକ୍ତ ମାନଙ୍କୁ ସେମାନଙ୍କର ମାନସିକ ପୂର୍ଣ୍ଣ ହେବ ବୋଲି ଆଶ୍ୱସନା ଦେବା କାଠିକର ପାଠ ହୁଅନ୍ତା । ସେ ଯାହା କିଛି ହେଉନା କାହିଁକି ସତ୍ୟବାଦୀ ବ୍ଳକ ଅନ୍ତର୍ଗତ  ଅଳଗୁମ ଗ୍ରାମ ସ୍ଥିତ  ଆରଧ୍ୟ ଦେବୀ  ମା’ଜାଗୁଳେଇଙ୍କ ପାରମ୍ପରିକ କାଠିଯାତ୍ରା ଶୁକ୍ରବାର ସଂଧ୍ୟାରେ ମହାସମାରୋହ ପାଳିତ ହୋଇଯାଇଛି । ମାଙ୍କର ବର୍ଷକୁ ୧୨ ଦିନ ଆଖି ଖୋଲାଯାଇଥାଏ ।ଅନ୍ୟ ଦିନରେ ମାଙ୍କ ଆଖିରେ ବିରିବଟାଯାବ ଦିଆଯାଇଥାଏ । ଭାଦ୍ରବ ମାସ ଷଷ୍ଠୀ ତିଥିରେ ମାଙ୍କ ଆଖିରୁ ଯାବ ଖୋଲାଯିବା ପରେ ପ୍ରଥମେ ମା ଟିକରପଡା  ସାହିରେ ଭୋଗ ଖାଇଥାନ୍ତି । ଦୁଆରି ଭୋଗ ଲାଗିବା ସମୟରେ ମାଙ୍କୁ ଭୋଗ ଭାବରେ ନିଶ୍ଚିତ  ଆମିଷ ଭୋଗ ଓ ମଣ୍ଡାପିଠା ଭୋଗ ଅର୍ପଣ କରାଯିବାର ପରମ୍ପରା ରହି ଆସିଛି ।  ଏହି ଯାତ୍ରାପର୍ବ ୧୨ ଦିନ ଧରି ଚାଲିଥାଏ । ଏଥିଯୋଗୁ ବାରଦିନ ଅଳଗୁମ ପଞ୍ଚାୟତରେ ଭାଇଚାରର ସମ୍ପର୍କ ଯୋଡି ହୋଇଥାଏ ।  ମା’ଙ୍କର ବିଜେ ପ୍ରତିମା  ଶୁକ୍ରବାର ଦିନ ମଧ୍ୟାହ୍ନରେ ମନ୍ଦିରକୁ ଫେରିବା ପରେ କାଠିଯାତ୍ରା ଆରମ୍ଭ ହୋଇଥିଲା । ଘଣ୍ଟ, କାହାଳୀ, ଢୋଲ, ମହୁରୀ, ହରିବୋଲ, ହୁଳହୁଳି ଧ୍ୱନି ମଧ୍ୟରେ ମା’ଙ୍କ ଶ୍ରୀଅଙ୍ଗରୁ ଆଜ୍ଞାମାଳ ଅଣାଯାଇ ୨୨ ହାତ ୨୨ ଆଙ୍ଗୁଳି ଲମ୍ବ ବିଶିଷ୍ଟ ଏକ ଶାଳ ଗଣ୍ଡ କାଠର ଅଗ୍ର ଭାଗରେ ଫୁଲମାଳ ବନ୍ଧା ଯାଇଥିଲା ।  ଶହଶହ ସଂଖ୍ୟାରେ ଶାଢ଼ୀ ଗୁଡିକ ମହାରଣା ସେବକମାନେ ସେହି କାଠିରେ ବାନ୍ଧିଥାନ୍ତି । ଭକ୍ତ ମାନଙ୍କ ଗହଣରେ କାଠିଟିକୁ ମନ୍ଦିର ଠାରୁ ଏକ କିଲୋମିଟର ଦୂର ବାରବାଟୀ ପଡିଆକୁ ବିରାଟ ପଟୁଆରରେ ନିଆଯାଇଥିଲା । ପଡିଆରେ କାଠିଯାତ୍ରା ଦେଖିବା ପାଇଁ ହଜାର ହଜାର ପୁରୁଷ ମହିଳା ଶ୍ରଦ୍ଧାଳୁ ଜମା ହୋଇଥିଲେ ।  ମା’ଙ୍କୁ ମହାପ୍ରସାଦ, ପଣା, ପଇଡ ପୂଜାରୀ ସେବକ ମାନେ ସମର୍ପଣ କରିଥିଲେ । ସେହି ୨୨ହାତ ଓ ୨୨ ଆଙ୍ଗୁଳି ବିଶିଷ୍ଟ କାଠିଉପରେ ବସି ଦେବୀଙ୍କ ଶକ୍ତିଧାରୀ କାଳେସି  ଗୁହାରିଆ ପଡିଥିବା ବିଭିନ୍ନ ଅଞ୍ଚଳର ମାନସିକ ଧାରୀଙ୍କୁ  ଆଶ୍ୱସନା ଦେବାସହ ପ୍ରସାଦ ଭାବରେ ଫୁଲ ଦେଇଥିବାର ପରମ୍ପରା ଚାଲିଆସୁଛି ।ଏ ବର୍ଷ ମାଙ୍କର ଚାରିଜଣ କାଳେସୀ ବିଜେ ହେଉଥିଲେ । ମାଙ୍କ ମହିମା ଏବେ ବି ଅତୁଟ ରହିଛି । ମାଙ୍କ କାଳେସି ମାନେ ଗୁହାରିଆ ପଡିଥିବା ଓ କାଠିଯାତ୍ରା ପଡିଆରେ ଥିବା ଶ୍ରଦ୍ଧାଳୁ ମାନଙ୍କୁ ଫୁଲ, ପାଦୁକ ଦେଇ ମାଙ୍କର ଆର୍ଶିବାଦ ଦେଇଥାନ୍ତି । ସଂନ୍ଧ୍ୟାରେ କାଠି ବାରବାଟି ପଡିଆରୁ ମନ୍ଦିରକୁ ଫେରିଥିଲା । ମନ୍ଦିରରେ ମାଙ୍କର ନୀତିକାନ୍ତି ସରିବା ପରେ ମାଙ୍କ ବିଜେ ପ୍ରତିମା ସୁରାଲାଗି ନିମନ୍ତେ ସୁରାଲାଗି ବରଗଛ ମୂଳରେ ରାତ୍ରି ଯାପନ କରିଥିଲେ ।  ଏହି ଅବସରରେ ମନ୍ଦିର ଆଖପାଖରେ ଖୋଲିଥିବା ବଜାରରେ ବିଳମ୍ବିତ ରାତି ପର୍ଯ୍ୟନ୍ତ କିଣାବିକା ଲାଗିବା ସହ ବିଭିନ୍ନ ସାଂସ୍କୃତିକ କାର୍ଯ୍ୟକ୍ରମ  ଅନୁଷ୍ଠିତ ହୋଇଥିଲା ।  ଅଳଗୁମ ଗ୍ରାମରେ ଗହଳ ଚହଳ ଲାଗିବା ସହ ଉତ୍ସବ ମୁଖର ହୋଇପଡିଥିଲା ।

ସାକ୍ଷୀଗୋପାଳରୁ ଧୀରେନ୍ଦ୍ର ସେନାପତି, ୨୯/୯/୨୦୨୩---୮,୧୦ Sakhigopal News,---- 29/8/2023-