ମା ଡୁଘୁରେଇଙ୍କ ଅଷ୍ଟମୀ ପୂଜା ଅନୁଷ୍ଠିତ

 

 ସାକ୍ଷୀଗୋପାଳ -------ପୁରୀ ଜିଲ୍ଲା ସତ୍ୟବାଦୀ ବ୍ଳକର ନରେନ୍ଦ୍ରପୁର ଗ୍ରାମ ପଞ୍ଚାୟତର ଘାସିଭବାନିପୁର ଓ ନରେନ୍ଦ୍ରପୁର ଗ୍ରାମରେ କାହିଁ କେଉଁ କାଳରୁ ମା ଡୁଘୁରେଇ ନାମରେ ପୂଜା ପାଇ ଆସୁଛନ୍ତି । ଏହି ଠାକୁରାଣିଙ୍କୁ ପୁରୀର ଦୁଇଟି ମଠ ସ୍ଥାପନ କରିଥିବାର ଲୋକମୁଖରୁ ଶୁଣିବାକୁ ମିଳେ । ଜନ ମାନସରେ ମାଙ୍କୁ ନେଇ ବହୁ କଥା ରହିଛି । ମା ପତିପଦା କାଠିଯାତ୍ରାରେ ଗ୍ରାମ ପରିକ୍ରମା କରି ଦୂଆରି ଭୋଗ ଖାଇଥାନ୍ତି । ତା ପରଠାରୁ ମାଙ୍କର ଷୋଳପୂଜା ଆରମ୍ଭ ହୋଇଯାଇଥାଏ । ପ୍ରତିଦିନ ସକାଳେ ଦ୍ୱାର ପିଟାହେବା ପରେ ହଳଦୀ, କର୍ପୁର, ଚନ୍ଦନ, ଅଗୁର, ଚୁଆ, ସିନ୍ଦୁର, ଗୋଲାପଜଳ, ଗଙ୍ଗାଜଳ ସହିତ ବିଭିନ୍ନ ସୁଗନ୍ଦିତ ଜଳରେ ମାଜଣା କରାଯାଇଥାଏ । ତା ପରେ ମାଙ୍କର ବେଶ ଅନୁଷ୍ଠିତ ହୋଇଥାଏ । ଧୁପ, ଦୀପ ଓ ଷୋଡସ ଉପଚାରରେ ମାଙ୍କୁ ପୂଜା କରାଯାଇଥାଏ । ମାଙ୍କ ପାଖେ ବାହ୍ମଣ ମାନେ ବାଳଭୋଗ ଭାବେ ଉଖୁଡା, କୋରା, ପାଚିଲା କଦଳୀ. ଚୁଡାଘଷା, ସେଓ, ଅଙ୍ଗୁର, ନଡିଆ, ନଡୁ, କାକୁଡି, ପଇଡ ସହ ବିଭିନ୍ନ ଫଳମୂଳରେ ମାଙ୍କର ବାଳଭୋଗ କରାଯାଇଥାଏ । ଅପରାହ୍ନରେ ବାହ୍ମଣ ମାନଙ୍କ ଦ୍ୱାରା ଶଙ୍ଗୁଡି ଭୋଗ ପ୍ରସ୍ତୁତି କରାଯାଇଥାଏ । ତା ମଧ୍ୟରେ ଖେଚୁଡି, ଡାଲି, ଡାଲାମା, ମାଛ ମେସର, ସାଧା ତରଖାରୀ, ଖଠା, ଖିରି, ପୋଡାମାଛ ବଳି, ଦହିପଖାଳ, ପିଠା , ପଣା ପଇଡ ଭୋଗ ଅର୍ପଣ କରାଯାଇଥାଏ । ଏହା ସହିତ ସାକ୍ଷୀଗୋପିନାଥଙ୍କ ପାଖରୁ ବଡପିଠା ଓ ସରପୁଳି ଅଣାଯାଇ ଶାନ୍ତି ପୂଜା କରାଯାଇଥାଏ ।  ପାଳି ଅନୁଯାୟୀ ଗ୍ରାମବାସୀ ମାନେ ମାଙ୍କ ପାଖେ ସେବା କରିଥାନ୍ତି । କରୋନା ଯୋଗୁ ଏ ବର୍ଷ ସବୁ ଠପ ହୋଇଯାଇଛି । କେବଳ ମାଙ୍କର ପୂଜା ସହିତ ନୀତିକାନ୍ତି କରାଯାଉଛି ବୋଲି ପୂଜକ ସନ୍ତୋଷ କୁମାର ପଣ୍ଡା ଓ ଅରୁଣ କୁମାର ପଣ୍ଡା କହନ୍ତି । ସେହିପରି ବୀରଗୋବନ୍ଦପୁରରେ ମା ଦୁର୍ଗାଦେବୀ ଓ ପୂଜିତ ମା ଦକ୍ଷୀଣକାଳୀ ,  ବୀରରାମଚନ୍ଦ୍ରପୁରରେ ପୂଜା ପାଉଥିବା ମା ମଣିନାଗ ଦୁର୍ଗା, ମହାମୟାସାହିରେ ମହାମାୟା, ଅଳଗୁମରେ ମା ଜାଗୁଳେଇ, ସେବକସାହିରେ ମା ଯାଗେଶ୍ୱରୀ, ମାଳେଶ୍ୱରୀ ବିଭିନ୍ନ  ଗ୍ରାମରେ ପୂଜା ପାଉଥିବା ଠାକୁରାଣୀଙ୍କ ପୀଠରେ ପୂଜା ଅନୁଷ୍ଠିତ ହେଉଛି । dddd

ସାକ୍ଷୀଗୋପାଳରୁ ଧୀରେନ୍ଦ୍ର ସେନାପତି